長途挑逗 #14 - Storyteller 馬交文 天光，送過celia上車，我行去熟食中心食早餐。頭痛欲裂，做作地叫咗杯凍檸啡。 曾經有位中學師兄教路，話檸啡解酒一流。聽到嗰陣我不以為然，如今卻奉之為至理名言。飲咗一啖，又酸又苦，卻的確提神。 個人一醒，千百樣事物係腦入面盤旋。我似一隻迷路既蚊，不知就裏地飛入密室，為著出口而費煞思量。 密室邊度有出口嫁？ 到底我係點樣踏入呢個死局，我都唔知。 celia既一句說話，時時係我耳邊徘徊：「其實，你唔使成日問我點解想飲酒，點解想唱K。好多野，根本就解釋唔到嫁啦。」但係我點樣解釋我既自私？去到呢度，呢場挑逗根本無出路，因為我已經比咗一個信息：我未可以行得更遠。有太多問題我解決唔到。可能celia唔介意行遠啲，甚至佢係鍾意我，但係任何關係，從來都係雙向既。我停低咗，呢段關係就再行唔到落去。 「唔叫野食呀文仔？」夥計笑笑口，我搖搖頭。 我連女都食唔落呀。 見到celia既whatsapp：「Back home now. You good?」 我無覆。 接著既一個禮拜，celia久唔久都會搵下我。 「you okay?」 「hey comeout tmr?」 「am not feeling well」 但係我都無乜點覆，直到celia又一次whatsapp我。 celia：「我下個禮拜行開一排。」 大吃一驚。 馬交文：「去邊？」 celia：「羅馬尼亞，intern。」 馬交文：「so sudden」 So sudden。 celia話會去兩個半月。我叫佢快啲預備。 celia：「會啦。今晚見下面？」 馬交文：「sure,but quite occupied ...wanna meet with my friends as well?」 Celia:「oh yea why not」 我知佢淨係想見我。但係，我唔想去到一個位，我同佢都唔知講乜好。我怕尷尬。 出到黎，見到A，B同埋C。我特登叫celia遲兩個鐘先黎。 如果你唔知佢地係邊個，佢地就係同我討論應唔應該溝女是否請客食飯嗰幾位仆街中同。毫無疑問地，我將我同celia呢個故事講比呢三位人兄聽。 A：「你當我地東方三博士呀？打電話問觀眾呀？」 馬交文：「當你地係智者先問姐。」 B：「一開始話Q咗你兩個有路啦。有食唔撚食，宜家瀨野啦，抵撚你死。」 C：「咁你宜家想點先文哥仔？四四六六拆掂佢啦。」 馬交文：「好坦白講，我唔想無咗佢。但係，唔通我同celia講「喂，我未預備好，但係我又唔想無咗你，不如繼續宜家咁啦」咁樣？邊有得flirt咁耐？」 C：「你都知你自私呢。」 B：「唔好搞到咁複雜啦，宜家你得兩條路行：一係一齊，一齊玩完。」 A：「或者你拖到佢番香港。不過，咁樣最麻煩。」 馬交文：「一齊仲麻煩啦。況且，我點知佢係咪想？我地一開始就係齋玩。」 C：「你唔好自己呃自己啦，個女仔肯咁樣陪你，你話係咪齋玩？話時話，要放手又好難既，佢條嚹咁深。不過呢，其實你係咪男人呢嫁，送到埋口都唔上？」 B：「定係其實你係鍾意佢，唔想傷害佢？你唔係鍾意佢，你就唔顧後果啦。不過，你諗清楚啲佢想點先啦。你一路話唔知人地點諗，都多尻餘既，唔鍾意你，同你做咁多野？」 再拖落去，對大家都辛苦。我知。偏偏B既一句令我明白，有啲野係心入面，我都知，但係我唔想面對。 電話一震，係celia。「I'm outside. Come pick me up?」

via HKU Dry Club http://ift.tt/1r7KD4W