Thursday, September 11, 2014
Non-love story #6057 [re #6028] 我同你感受簡直十成十一樣 我好早就發現自己性取向同大多數人唔同，但又唔敢認，連我自己都逃避自己 有時我D姨媽姑姐問起我有冇女朋友，我根本就唔識點答，唯有黑面講句唔關你地事推搪 但其實我內心真係好驚 我成日都覺得自己好似收埋左D唔見得光既野，搞到我無論幾時都冇辦法打開自己個心對人 其實我都feel到我D朋友對件事都略知一二，有時會講笑咁試探我，我每次都會搵方法逃避 但當我隱瞞既時候又會覺得自己係到呃緊佢地，好唔誠實，會不斷責備自己 慢慢我發現我根本就唔再敢同其他人咁熟，我好怕一熟落佢地會發現我既秘密 其實我係一個好想有人陪既人，但礙於自己性向我根本就唔敢搵人拍拖 見住自己既朋友一個一個搵到男女朋友，自己就只可以苦笑一下自嘲forever alone 果種感受真係好孤獨好悲涼 我係網上知道其實有好多同志都好濫交，成日同D唔識既人做，最後搞到自己染埋一堆性病 但我真係唔係D咁既人，而且係我發現左件事之後成個人都變到好自我保護 所以你話用交友apps搵朋友之類，我只可以同你講我唔想比人呃，亦唔想搵D不懷好意既人做朋友 有時，我都曾經想過其實我可唔可以改變自己性取向 但無奈真係冇興趣就冇興趣 對住女仔我只有friend既感覺，完全唔想同異性關係再進一步或者建立家庭 有一次我甚至有想過接受一個相熟女仔既追求，可能試下就會有改變呢 但我真係唔想hurt左人又hurt到自己，最後只好話自己唔準備拍拖 近來睇到新聞上面講到一D老年既同志日日係公廁裝人同騷擾人地 我好驚好唔想自己會變成咁，如果要咁樣滿足自己咁不如死左好過 不過我最好彩就係有一個幸福既家庭，雖然我一路都唔敢同佢地講 但每次我有自殺念頭既時候一想起屋企人就會立即醒覺 但究竟我可以撐到幾時？究竟我係咪真係要一個人過成世？我真係唔敢去諗... From 紅磚大學 (PolyU) ==================================================== >> http://bit.ly/sharesomething \u003C\u003C 歡迎你向我哋訴說心底話/發表偉論/純粹9up/爆料/尋人求偶，圖文均可
Subscribe to:
Post Comments (Atom)
No comments:
Post a Comment