長途挑逗 #10 - Storyteller 馬交文 Celia提醒我，幾個月前我同女朋友分手。 避得一時，避唔得一世。學期期間我尚可以用工作淹埋自己，到宜家我不得不面對以前種種。 望住天花板，我有好多野諗唔通。我無做錯野，甚至我肯放低以前既一切一切。但係到頭來話要走既，係佢唔係我。可能，我既仆街，我睇唔到，又或者，同前度呢段關係熟對熟錯，已經難以搞得清楚。 呢啲邊個對唔住邊個既課題，從來就係難以辨清。 我知道既係，由頭到尾放唔低既，係我。宜家既我承受唔起一段太重既關係，我淨係想有個人係隔離。 Celia都應該係一樣。 六月頭，幾乎每日既夜晚，我同celia都會約出黎。或者係食宵夜，或者係飲酒，或者係漫無目的咁散步。 佢都再無問我既事，而我地講既野都總係不著邊際，就好似《志明與春嬌》入面，張志明同余春嬌係公園研究賣貼紙/做天文台既阿婆同埋蝸牛，又或者係停車場張志明嚇余春嬌嗰種情節。 我同佢都面對唔到一啲野。我同佢都需要打發時光。 好幾次我或者celia既朋友嗌飲野，我地都會叫埋對方。我有朋友曾經問我：「新女？幾得喎。」 我口講：「唔係啦，咁佢係附近，咪嗌埋一齊玩。」心入面我卻知道，我根本唔識界定同佢既關係。 我連自己想點都唔知，又點開始一段新既感情？我寧願停留係呢種似有還無。 坐係檯前面發呆，突然電話係度震。 celia：sing k ma? 我無諗太多。 馬交文：us tonight? Yea 銅鑼灣，十點，sogo門口等。 由屋企出發，準時十點，我去到sogo，見到celia。「行囉。」「我未食野，頭先hall有野做。」「哦。」 係附近一間茶餐廳坐低，我叫做支可樂，celia卻耐一耐都未叫。 我問：「你唔係肚餓咩？」 celia反問：「你估下我想食咩？」 我隨口答：「炒公仔麵。」其實係我每次黎都食。 celia就嗌：「伙計唔該，一個炒公仔麵。」 當我為我估中而暗自高興，celia卻話：「其實我唔係想你估，而係我諗唔到食咩。」 我口講：「玩啦你，唔鍾意食咁點？」個腦卻係度諗：禁即係點先？我可以幫佢揸主意？ 食完野，我同佢行去糖街，我問celia：「點解想唱K？」 celia話：「想唱歌唔得既。」 「好，不過我唱得差。」 「唔緊要，你飲。」 「你呢？」 「飲同唱係可以並存既，係咪？」

via HKU Dry Club http://ift.tt/1wsnAFX