《關於放榜，我想說的是...》#3 [升中放榜 · DSE放榜] 今日小六升中放榜。 六年前嘅今日，屋企人刀仔鋸大樹策略成功，我成為全校唯一一個入到九龍區名校嘅學生，當時，全校嘅老師為咗我好興奮咗好耐，我媽就好似電視入面啲師奶咁開心到跳，當時我唔太明點解會咁開心。 嚟自屋邨小學，屋企有工人姐姐嘅我，平日仲可以也文也武請人去自己屋企玩，升到中學後，飛上枝頭變鳳凰嘅虛榮心成為鄉下仔出城嘅自卑感。 我屋企有工人姐姐，人哋都有，係三個。 我細個會養下魚，人哋都會，不過係幾十條咁養。 我屋企有車，人哋都有，係阿爸阿媽阿哥每人一架。 我放假同朋友去neway，人哋放假去馬會跑馬地clubhouse唱K。 喺小學同學面前，我會好得戚講下名校嘅見聞，喺學校，我就係一隻鵪春。 論家底，我輸十條街。論學業，我輸一百條街。 可能因為我細個係朋友圈中有錢又讀書叻嘅一個，我一直都好重視呢兩樣嘢。上到個間學校，我覺得自己係負。當身邊人豐厚嘅家底令我自卑，佢哋嘅造詣更加令我無地自容。 你學琴，人哋都係學琴，不過係豎琴。 你小息會玩鬥獸棋，人哋已經玩緊國際象棋。 你以為自己玩過常識問答比賽好勁，人哋已經跟住做教授嘅阿爸出出入入大學實驗室。 曾經因為自卑而無心向學，最後因為自卑而發奮圖強。DSE榜都未放，講呢句可能太早，but I have already tried my best. 給電視機入面喜極而泣嘅小六同學，祝你哋前程錦繡，希望六年後嘅DSE放榜你哋都係笑得咁開心。 ================================= Free Membership ==> http://bit.ly/dryclubmember 請按"Like" -> 按"Get notifications" 緊貼 HKU Dry Club Updates 對抗Facebook進一步限制page reach

via HKU Dry Club http://ift.tt/1mc0H5u