HKU Dry Club. Since 2012.: 長途挑逗 #11 - Storyteller 馬交文畫面裏面既字幕，由白變藍。對於一個無聽過太多K歌既人黎講，唱K之意早已經不在唱歌。講到低，我唱到啲咩歌？我對上一隻聽過既周杰倫，已經係珊瑚海。所以，我大多時候都係飲酒同埋聽celia唱。我好似從來未聽過咁多孫燕姿同容祖兒。「馬交文，你快啲揀歌啦。叫你唱K你就齋坐。」「咁我想黎飲多過唱...我唱得差，拍子都捉唔准。」「唱得好你去唱新秀啦。」我斟咗杯black label，跟住攞起celia隻杯斟。「唔溝mixer？飲shots咁飲呀？」「就咁就好。」我一啖飲完。celia亦如是。望住個遙控，我係度諗，其實我黎做乜？我開始點歌。點黎點去，都係麥浚龍，最多有幾隻beyond，張學友，劉德華，李克勤。大家各自唱過幾首，跟住又到celia。攞起支酒，我先發現原來我同celia已經飲咗半支。我望住唱緊歌既celia。我視線無離開過佢。我記起第一日係st.johns見到佢。記得一入dining hall，所有著紫色T恤既人無時無刻都係度尖叫，我有啲唔習慣。入到組，我同組媽講咗兩句，同大家自我介紹完，就坐咗係度周圍望。就係嗰刻，我見到坐係對面既celia，垂低頭，係度睇campbook。佢抬起頭。我地大家都向對方點頭，笑咗笑。大抵係每個人心目中，都有一啲四目交投特別難以忘記。可能，Celia就係我係度既原因。「woohoo唱完，到你啦。」celia攤咗係我隔離。大概佢都飲咗唔少，佢塊面好紅。到麥浚龍既借火。「不如我地聽呢隻歌。」我伸手攬住celia。佢挨住我膊頭。聽下聽下，我記起有一日因為同前度分手攬住呀媽係度狂喊。聽下聽下，我記起係水街同celia飲酒。聽下聽下，我覺得隻歌根本就係我同celia既寫照。直到我同celia再次四目交投。我同celia，越哄越埋，去到一個位，我同佢都停低咗。「我地...做緊乜呀？」「唔好諗咁多。我唔想諗咁多。」我決定要揸次主意。我錫咗埋去。